[الشريرة]

السلام عليكم ورحمه الله وبركاته

أشعر بتردد قلمي في الكتابة ولا أعلم لما؟؟؟

ربما لانه اليوم لن يكتب قصة من نسج خيالي كما عودكم...بل سيكتب فصل من كتابي

ذكرى لن يمحوها الزمان عن ذاكرتي

تجربة دخلتها مجرد طفلة لأخرج منها فتاة راشدة

تجربة أستمرت لأربع أسابيع فقط......أربعة أسابيع ولكنها كانت كافية لتغير حياتي

نظرتي للحياة

أسلوب تعاملي مع الأخرين

والأهم من ذلك هو

أن أؤمن بحدسي


منذُ أسابيع وعندما علمت بأقتراب موعد عودة غاليتي وشريكتي دمعة الجوري

أخبرت شخصا بأني سأفعل شيئاً مختلفاً في قاعة القصص عندما تعود دمعة الجوري

ذلك الشي هو كتابتي وجعلكم مطلعون على ذكرياتي المقتصرة بين 4/2005 إلى 5/2005

بالتحديد بعد أسبوع واحد من تسجيلي في هذا المنتدى.....منتدى قصر العرب

لذلك أخترت طرح هذه الذكرى دون سواها

لأنكم كنتم جزء منها

لندع المقدمة ونبدأ بسرد قصتي وذكرياتي

طبعا بالغة العامية حتى تكون واضحة أكثر و عفوية أكثر

سأنقل لكم الحقيقة كاملة (( قدر المستطاع ))

ملاحظة: قد أقوم بتقديم حدث أو تأخيره بسبب عدم تذكري حدوثه بأي يوم بالضبط


عواصف في الكهف ...أهداء إلى دمعة الجوري




كنت محتارة..مضايقة ...طفشانة

رميت بجسمي على السرير وأستسلمت لأفكاري وخيالي ...أحاول أطفي نار غضبي

لكن اللي صار هو اني بسرعة قمت ورحت للكمبيوتر و الجمر يطاير من عيني

دخلت واحد من المنتديات وكان بالواقع ثاني منتدى أشارك فيه مع أميرة الذيب و ملكة الأحساس

المنتدى الأول كان ينغلق وايد بسبب عطل فقمنا وسجلنا بهالمنتدى

أما باقي المنتديات كنت أسجل فيهم مع شلة النت اللي أعرفهم من سنوات

أخذت نفس عميق و كتبت عنوانه...وكنت على وشك أني أسجل دخولي لكن بعدها تمالكت نفسي و قمت أردد

(( مايسون...ماله داعي أحرق أعصابي على ناس مايسون)) >>> اول مرة حد يسلم من شرها

كانت في مشكلة بيني وبين مدير المنتدى وبعد ماسبيته برسالة خاصة وأعلنت أنسحابي ..طبعا قلت بنسحب قبل مايشوتني...يعني أطلع بكرامتي

قامت ملكة الأحساس وأميرة الذيب بأعلان أحتجاجهم على أدارة المنتدى (( طبعا محد كان يعرف ان نحن الثلاثة ربع ))

وكان النتيجة ان الأعضاء طاحوا فيهم ^^.

وكنت أبي أدخل أهزئهم كلهم لكن مابغيت ادخله مرة ثانية ومديره واحد ...............


كنت محتاجة لافكر بشي يشغلني عن رغبتي في الهواشات

حطيت راسي على المخدة ورفعت ريلي وحطيت ريل على ريل >>>>نومة الشخصيات المهمة :D

كان الجهاز بعده مفتوح ومقابل لسريري ....قعدت أفكر وكل ماخطرتلي فكرة كنت ألف اطالع الكمبيوتر وبعدها لما الفكرة ماتقنعني ارد اطالع السقف

كنت أفكر بالمنتديات اللي مشاركة فيها

وكنت أغلب وقت فراغي عليهم ومافي شي مشترك من ناحية النت بملكة واميرة

وكان المنتدى اللي طلعت منه كان المنتدى الوحيد اللي يجمعنا في النت

بالنسبة للمنتديات اللي انا مشاركة فيها

في بعضها أظهر قدام الأعضاء إنسانة عاقلة وحكيمة :p >>>امحق مايليق

والبعض الأخر فيهم أدارية او مشرفة

وفي الحالتين بتكون مصيبة لي لو سمحت لأميرة الذيب أو ملكة الأحساس انهم يشاركون فيهم

والعلة الكبيرة لو عرف الأعضاء أنهم أربيعاتي >.<

أذكرت لما الوحدة فيهم تقولي يافلانة أكتبيلي رسالة أعتذار بأسمي عشان أرسلها لمدير المنتدى الفلاني عشان يشيلون عني الحظر

هالثنتين بكل معنى الكلمة ...بلـــــوة .. ×.× ..

لازم دايما يتهاوشون في المنتديات لحد ماينطردون >>>ياويلي منهم لما يقرون كلامي هذا ههههههه

لكن طبعا هم ألحين تغيروا و عقلوا ^_^

بصراحة بيني وبين نفسي ماكنت قادرة أثق بعقلهم وتغيرهم المفاجئ

ففكرت عشان أضمن اني اسجل بمنتدى وأدعوهم له..بس إي منتدى ؟؟؟

مابي أسجل بأي منتدى جي خرابيط...قعدت أفكر

سجلت بمنتديات إماراتية...سعودية و كويتية

تمنيت بلحظتها أسجل بمنتدى لدولة غير

قلت بحريني؟؟؟ قطري؟؟

بس في المنتديات اللي كنت اشارك فيها أختلطت مع بحرينيين و قطريين

فقلت خلني أكمل مجلس التعاون و اسجل بمنتدى عماني :D

قعدت ابحث بقوقيل ....لقيت موقع عماني نسيت اسمه فيه افضل المنتديات العمانية

ضغطت على واحد منهم أسمه عجبني بس لما دخلته عيوني عورتني من ألوانه فطلعت على طول و كملت قراية باقي الاسامي

وقفت عن اسم (( قصر العرب )) وعجبني ^_^

دخلته فلمحت مكتوبة (( القاعة الــ... و القاعة الـــ))

ولا حتى دخلت اي وحدة فيهم او نزلت تحت اشوف انشط الاعضاء او غيرهم

على طول ضغطت تسجيل

قلت بخاطري ليش اهتم اشوف شو فيه دام بالنهاية المصير معروف ^_^

وقفت عند أسم المستخدم

كنت بسجل بواحد من الأسامي اللي معروفة فيها في النت لكن غيرت راي وقعدت أفكر بأسم ثاني

أذكرت بنت اختي واللي مسمينها علي....طبعا هذه شيخة البنات و دلوعتي

عمرها 5 سنوات لكن لا اللي اصغر عنها ولا اللي اكبر عنها سالم من شرها :p

وكل ماسوت شي قالوا انها تشابهني ...بالخبال...بالأزعاج.....بالدلع.....بالشر....بكل شي :{non}:

وصار نص أهل البيت ينادونها بالشريرة و يقولون طالعه على خالتها الشرية

فقمت وكتبت أسم العضو (( الشريرة )) ^_^

بعدها نزلت لتحت وشفت عدد المتواجدون الأن (( 0 ))

طبعا في حد كان بالوضع الخفي بس انا اللي شفت اسمهم ظاهر كان عددهم (( 0 )) فضنيت ان محد في المنتدى

كانت الساعة 1 او 2 الفجر و بداية الاسبوع رحت نزلت موضوع الترحيب و قعدت أشارك في مواضيع عشوائية لحد ما انتبهت ان في حد رد على موضوعي

كانت جنون اللي راده ^_^ وانا ضنيتها ولد هههههههههه

فقلتلها مشكور اخوي على الترحيب و......ألخ

فقالتلي ابي اعرف ليش الكل يضنوني ولد

قلت بخاطري : بل من اولها قفطة...لا البداية ماتبشر بالخير .

بغيت أكتبلها لأن لا اسمج ولا صورتج ولا حتى توقيعج فيهم شي واحد يخليني أعرف انج بنت بس بعدها مسكت نفسي قلت مب من أولها بتمشكل مع الأعضاء :p

أكتفيت اني أعتذرللها على الخطأ الغير مقصود ^_^

ثاني يوم كانت أميرة الذيب غايبة وماقالتلي ×.×

فعشان جي قلت لملكة الأحساس قبل عن المنتدى وكان هالكلام قبل الدوام فلما شافت ملفي قالتلي : وين قاعده انتي من اول يوم 12 تعليق بسم الله.

قلتلها: مادري فيني طاقة وبغيت أطلعها :p

بوقت البريك أكتشفنا ان أميرة الذيب ماكانت غايبة بس خذتها النومة خخخخخ >>>فضحتها


كنت قاعدة أشارك في المنتدى وملكة الاحساس واميرة يسألوني : فلانة بأي أسم نسجل؟؟؟؟.

>>>ماتحب حد يسولف معاها وهي مندمجة

الشريرة: ماعرف...سجلوا باللي يعجبكم

ملكة الاحساس: بسجل بأسم ملكة الاحساس.

أميرة: انزين انا بشو أسجل؟؟؟

الشريرة: ماعرف ........

حطت أميرة الذيب صبعها على حذها وقالت : ابي شي يخص الذيب.

الشريرة :شوو؟؟؟ لاااااااااا O.O ..... مب حلو..مب حلو الذيب >>>ماكنت ابي حد يلقب نفسه بالذيب غيري...أعتبره شي خاص فيني ×.×

قعدت أقص عليها وأطلعلها ألقاب ثانية لكنها بالأخير سجلت بأسم أميرة الذيب :{non}:

ثاني يوم كان عندي إجتماع بالبريك

أحم أحم وصلت متأخره شوي ^_^

قعدت على الكرسي أستمع لوحدة من المسؤولات في الكلية وأسمها كفاح

قولي معاي ياعلها ماتكفح طول عمرها على اللي سوته فينا >.<

محد يطيقها في الكلية...ودائما وهذه حقيقة لا مبالغة فيها أنها تتلذذ بخلق المشاكل للطالبات

المهم بس بيومها كانت تسوي روحها طيبة وقاعدة أتكلمنا وتوجه لنا بعض النصايح والمقترحات لتجربة اللي كنا بنخوضها ونحن مانعرف عنها إي شي ولا عندنا إي خلفية عنها غير الأقاويل اللي لاتودي ولا تجيب


بنهاية الأجتماع سلمت كل وحدة فينا ورقة خاصة فيها

أول شي بحثت عنه هي كلمة supervisor from college

من شفت الاسم حسيت أن نص الهم أنزاح عن صدري...بعدها قعدت اقرأ باقي المعلومات من دون لا اعرف ان الورقة هذه اللي ماسكتنها وسط إيدي هي البوابة للكهف الي تعصف فيه الرياح


ياترى شو حقيقة الكهف هذا؟؟؟ وحقيقة الرياح اللي تعصف فيه؟؟؟

هل هو حقاً كهف بمعناه الحرفي أو مجرد تشبيه؟؟

وشو علاقة قصر العرب بتجربتي هذه؟؟؟

واللي بسببها كنت أضن وحاطة في بالي أن اشتراكي في قصر العرب لفترة محدودة وبالضبط لأسبوع واحد؟؟؟


أذا حابين تعرفون أنتظروا الجزء الثاني من

عواصف في الكهف

واذا لاه أنسوا السالفة :D


أحترامي و تقديري

الشريرة

شريرة قصر العرب

[دمعة الجوري]

بسم الله الرحمن الرحيم

يسعدني بأن أسجل أعجابي

كأول الواصلين لحروف

كأصداف لؤلؤية ألقى بها مدك ..

على شواطئ العطشى

ذكريات ستبقى محفورة في قلبي ولها صدى كبير عندي ياأستاذتي الغاليه ;)

أغلـــــــــى هديه بحياتي وأحلــــى مفاجأه لي الشــرف والفخــــر وربي :shy:

ربي مايحرمني وجودج يالغاليه ..

فديييييييييييتج والله انا بأنتظار الجزء الثاني على أحر من الجمر ;)

تقبلي مني وردة جوريه {th}:

أختج .. دمعة الجوري ..

[غالــي الاثمان]

السلام عليكم ورحمة الله وبركاته

اختي الشريرة كملي القصه اذا ممكن ..

وانتي بهذا اللون الجديد من السرد اتشجعينا نكتب عن ذكرياتنا

في هذا القصر ..

والاخت دمعة الجوري تستاهل كل خير ..

يلا عافيه على الشاطره كملي القصه ..

واتمنى من جميع الاعضاء التعاون في كتابة بداياتهم مع قصر العرب ..

( طبعاً بعد ماتنتهي الشريرة من كتابة القصه كامله )

[غالية]

هلا شرشر
يلا كملي ترااااااااني وااايد مستعيله عشان اعرف شو السالفه <<<اعوذ بالله من الفضول ^^
نتتظر الجزء الثاتي على احر من الجمر

[الشريرة]

هههههههه
هلا والله بشيوخ المنتدى

ان شاء الله راح اكمل القصة ولا يهمكم

من عيوني الثنتين>>>>الله يستر على الفضايح اللي بتطلع :p

[الشريرة]

الجزء الثاني

اخذنا كفايتنا من النصح والارشاد من المسؤولة وكل وحدة راحت عند
شلتها

رحت لميلس الكلية وكانت اميرة وملكة قاعدات هناك ويسولفون في دردشة و تسالي قصر العرب

اول ماشافتني ملكة الاحساس قالت:هاه شو وين كنتي؟؟؟؟

الشريرة: كنت بجتماع عشان الورك بليسمت ( دورة تدريب للعمل تخصصه الكليات والجامعات)

ملكة: متى بتبدأ؟

الشريرة: السبت الياي.

ملكة: الله بس اسبوع واحد باقي....شيييييت.

الشريرة: بس الحمد الله طلعت المراقبة علي مس سمر يعني تقريبا نص خوفي انزاح

مس سمر او المدرسة سمر كانت من أفضل الاساتذة اللي درسوني وكنت متفوقة عندها ومن أفضل تلاميذا وكونها هي المسؤولة عني معناته انها راح توقف جنبي لو صارت اي مشكلة

من قوانيين الورك بليسمت ان لو غبنا يومين من دون عذر على طول رسوب

الورك بليسمت حالة من حال اي مادرة اذا رسبنا فيه نعيد الكورس على طول

اما لو غبنا وحتى بعذر هذا راح يقلل من مستوانا ودرجتنا فيه

يعني لكل الحالات ظلم * ظلم


في الورك بليسمت يختارون عددة اماكن مختلفة

شركات ....مشتشفيات او جامعات و يوزعون البنات عليهم

وبشكل عشوائي

يعني يا تكون وحيد وسط ناس ماتعرفهم او يكون الحظ حليفك وتكون مع اصدقائك او ربعك اللي معاك في الكلاس نفسه

من حسن حظي او سوء حظي ربما

طحت بجمعية نسائية مهتمة بعده اشياء

وفي مدرسة خاصة ملتحقة بيها

هالجمعية مكانها بعيد واااااايد عن بيتي

في البداية كنت مخططة اني اروح واجي مع اختي او اي احد من أخواني

لكن أخواني الاولاد كل واحد وقت دوامه مايناسب وقت دوامي في الجمعية

وأختي تعرضت لحادث (الحمد الله ماكان كبير وماصارللها شي) بس بسبته كانت لفترة تخاف ترجع تسوق السيارة وماراح هالخوف الا بعد ماخلصت الورك بليسمت>>> صج اني منحوسة l][a

ههههههههههههههههههههه

فهي كانت تروح مع ستة بنات متفقين مع واحد يسوق باص صغير يوصلهم لدواماتهم

واماكن عملهم جنب بعض بالضبط

وتم القرار اني اروح معاهم في الباص :cray:

ما كان قدامي غير الرضوخ للامر مجبرة

أول يوم
كان معاناة بصراحة

قمت من الساعة ٥ ونص وكانت هذه اول مرة اسويها من سنين

أختي أجهزت وخلصت وأنا ماخذة راحتي تقولي يافلانة خلصي وأمي تقولها لا خليها على راحتها بعده اول يوم

قعدت أغايض أختي:p

لما وصل الباص قعدت امي تقول لاختي: ديري بالج على اختج...هذه امانة

اختي تضحك وترد عليها: بقطها بالزبالة....بشوتها ماعندي دلع وهالسوالف

الوهقة لما جيت اركب الباص الباب ماله ماعرف كيف يتصكر او يتبطل خخخخخخخخخخخ شكله غريب عجيب

لولا ان اختي كانت راكبة قبلي وفاتحتنه ولا كنت بقعد احوس فيه ساعة ههههههههه

ركبت وقلت بخاطري ماعلي والله افشل روحي ....مابصكره

رحت وقعدت باخر كرسي ( اللي هو اصلا رابع كرسي)

أختي: احم احم الله يفضحج...ماسكيتي الباب

قامت هي وصكت الباب بدل عني وميته من الضحك وأنا قاعدة مؤدبة ولا كني سويت شي

راعي الباص كان من اصل خليجي وهذا صارتلي سالفة مضحكة وياه بعدين بتعرفونها


قلت لاختي : ألحين كيف يعني بيوصلني انا قبل؟.

اختي: لا بيوصلنا نحن كلنا نفس الترتيب ولانج يدية بيوصلج اخر شي.

الشريرة: نعم؟؟؟؟ شو انا ماندل انزين وين مكان هالجمعية.

اختي: هو يدل.

الشريرة: اكيييييييييييييييييييييييد؟؟؟؟؟.

اختي: هيه عادي لاتهتمين.

نسيت اذكرلكم شغلة وهي ان في الباص معانا ولدين صغار واختهم يروحون مدرسة خاصة ....طبعا بتستغربون ليش اتكلمت بكل هالتفصيل عن الباص واللي فيه لكن هالشي راح يوضحلكم السوالف اللي بتصير بعدين


قالت وحدة من البنات لاختي: هذا صج اختج؟.

الشريرة بخاطرها: بديناااااااااااااااا.

اختي: هيه هذه اللي اصغر من فلانة.

قالتلها الثانية: ولا يخصها فيكم مب كنها أختكم.

طول المدة وانا مسوية روحي ماسمعهم ولا اهتم باللي يقولونه

يتكلمون عن شكلي و دراستي وانا اقول بخاطري ماخلوا شي ما سألوا عنه l][a

فرق العمر اللي بيني وبين اخواتي وايد كبير فعشان جي كنت بالنسبة لربعهم مجرد شخص يسمعون عنه لكن ولا مرة شافوه

لاني اصلا لما يزورونا في البيت يا أكون بالكلية او اذاكر امتحاناتي يعني ابد ماختلطت فيهم الا كم وحدة

لكن ول ماذكروا مباراة الوحدة مع العين وأكتشفت ان كلهم وحداويات قمت وسولفت معاهم بخصوص المباراة :D

مر الوقت وكلهم نزلوا وبقيت بروحي

وقفنا عن مكان قالي راعي الباص : هذه هي.

الشريرة: هذه؟؟؟؟

راعي الباص: اي ...انزلي وتأكدي وانا بكون هنيه.

الشريرة: اوكي.

لما نزلت شفت واحد فسالته هذه هي جمعية الــــ....

قالي : هيه .

راعي الباص لما سمع الريال قال جي قال : عيل انا رايح ولما يخلص دوامج اتصلي.


الشريرة: ان شاء الله.

بعد ماراح اخذت نفس عميييق ودخلت الجمعية....بصراحة كان شكلها مايشجع ومب نفس ماوصفوها لي

فوضة....بهذلة

قلت مايخالف الا هو شهر واحد بس

شفت فراشتين فسالتهم : وين مكتب نيلة؟؟

هو أصلا اسم الحرمة نجلاء بس الخسوف في الكلية حاطين اسمها في الورقة نيلة ويادي النيلة اللي صارتلي ههههههههههه

اشوف الفراشات استغربوا وقالت وحدة فيهم: انا مافي معلوم.

الشريرة: مافي معلوم؟؟؟ الله يستر....نيلة...نيلة.

الثانية: مافي نفر اسمه نيلة.

الشريرة: انزيم وين الادارة؟

ردت الثانية: هناك روح..هناك.

الشريرة: انزين شكرا.

طلعت من المكان ودرت في الجمعية مافي حد بل وين العالم

اخرتها لقيت ثنتين مواطنات ورحت سالتهم ونفس الشي استغربوا وريتهم الورقة وكانت الصدمة

قالتلي وحدة منهم: ايوووووووووووا هنيه مكتوب المقر الرئيسي للجمعية.

الشريرة: ليش هذا مب المقر الرئيسي؟.

ردت علي: لا...هذا الفرع اللي في منطقة البطين.

الشريرة: شو أنتي متأكدة؟؟؟


شو اللي صار بعدها؟؟؟؟؟؟؟؟

وكيف أتصرفت؟؟؟


راح تعرفون كل هذا بالجزء الثالث


انتظرواااااااااااااا

ابي اشوف عدد تعليقات ٥ او ٦ عشان أكمل k8a

[غالية]

يلا يا الشريره كملي حرااااااااام عليج القصه مشووووووووووقه ^^

[غالــي الاثمان]

اقتباس :

ابي اشوف عدد تعليقات ٥ او ٦ عشان أكمل

:LolL:

طيب بعد التخفيضات ..؟

وعشان خاطر دمعة الجوري وغالية كم تعليق ؟

[دمعة الجوري]

ههههههههههههههههههههههههههههههههههههههههههههههههههه فديت نيله والله :D

خليهم يحشووووون فيج فديتهم هع هع هع هع هع هع :D

شرشر يالبطـــــــــــــــه 5_6 l][a آنااا شيصبرني l][a


هع هع هع هع وهو صاج غالي يلا نبي تخفيضات حجيه

[دمعة الجوري]

4 نيهاهاهاهاهاهاي :D

[دمعة الجوري]

5

يلا يلا خلاص صار خمس ردود هع هع هع هع <<<<< تحس انها بتنفلع الحين :D

[الشريرة]

اقتباس : المشاركة الأصلية كتبت بواسطة غالية

يلا يا الشريره كملي حرااااااااام عليج القصه مشووووووووووقه ^^

بكمل بس ................. :{}:

اقتباس : المشاركة الأصلية كتبت بواسطة غالــي الاثمان

:LolL: طيب بعد التخفيضات ..؟ وعشان خاطر دمعة الجوري وغالية كم تعليق ؟

هع ماشي تخفيضات k8a

اقتباس : المشاركة الأصلية كتبت بواسطة دمعة الجوري

ههههههههههههههههههههههههههههههههههههههههههههههههههه فديت نيله والله :D خليهم يحشووووون فيج فديتهم هع هع هع هع هع هع :D شرشر يالبطـــــــــــــــه 5_6 l][a آنااا شيصبرني هع هع هع هع وهو صاج غالي يلا نبي تخفيضات حجيه

أخليهم يحشون فين هاه يالبومة؟؟ l][a

انا اوريج angry4[1]

ولاتغشين بالاعداد

انا قلت 5-6 مشاركات

يعني لخمسة ولا ستة نفر >>>تأثرت
:D